செயற்கை நுண்ணறிவு (AI) தொழில்நுட்பத்தின் அசுர வளர்ச்சியால் ஏற்பட்டுள்ள அதீத மின்சாரத் தேவையினைப் பூர்த்தி செய்யும் பொருட்டு, உலகளாவிய ரீதியில் நீண்ட நேர மின்சேமிப்பு (Long Duration Energy Storage - LDES) கட்டமைப்புகள் மிக வேகமாக விஸ்தரிக்கப்பட்டு வருகின்றன.
ஒரு சாதாரண கூகுள் தேடலை விட, AI மூலம் பெறப்படும் பதில்களுக்குப் பத்து மடங்கு அதிக மின்சாரம் செலவிடப்படுவதாக ஆய்வுகள் தெரிவிக்கின்றன. இந்தச் சவாலை எதிர்கொள்ள மைக்ரோசாப்ட், கூகுள் மற்றும் அமேசான் போன்ற முன்னணி நிறுவனங்கள் தற்போது புதிய எரிசக்தி வியூகங்களை வகுத்து வருகின்றன.
AI ஆல் உருவான மின்சார நெருக்கடி
சர்வதேச எரிசக்தி முகமையின் (IEA) சமீபத்திய அறிக்கையின்படி, தரவு மையங்களின் (Data Centers) மின்சாரப் பயன்பாடு வரும் 2030 ஆம் ஆண்டளவில் ஜப்பான் நாட்டின் மொத்த மின்சாரத் நுகர்வை விட அதிகமாக இருக்கும் எனக் கணிக்கப்பட்டுள்ளது. 24 மணிநேரமும் இயங்கும் AI சர்வர்களுக்குத் தடையில்லா மின்சாரம் வழங்க சூரிய சக்தி மற்றும் காற்றுச் சக்தி மாத்திரம் போதுமானதாக இல்லை. இதனாலேயே, சேமித்து வைக்கப்படும் மின்சாரத்தை நீண்ட நேரம் வழங்கக்கூடிய LDES தொழில்நுட்பம் தற்போது அத்தியாவசியமாகியுள்ளது.
களத்தில் இறங்கியுள்ள முன்னணி நிறுவனங்கள்
கூகுள் (Google): அமெரிக்காவின் மூன்று முக்கிய மின்சார விநியோகஸ்தர்களுடன் இணைந்து 1 கிகாவற் (GW) மின்சாரத்தை நீண்ட கால ஒப்பந்த அடிப்படையில் பெற்றுக்கொள்ள உடன்படிக்கை செய்துள்ளது. இதில் சூரிய மற்றும் புவிவெப்ப (Geothermal) சக்தியுடன், நீண்ட நேர மின்சேமிப்புத் திட்டங்களும் உள்வாங்கப்பட்டுள்ளன.
புதிய தொழில்நுட்பங்கள்: லித்தியம் அயன் பட்டரிகளுக்குப் பதிலாக, 100 மணிநேரம் வரை மின்சாரத்தை வழங்கக்கூடிய 'Iron-Air' பட்டரிகளை அமெரிக்காவின் 'Form Energy' நிறுவனம் அறிமுகப்படுத்தியுள்ளது. அதேபோல், 'ESS Inc' போன்ற நிறுவனங்கள் இரும்பு-உப்பு (Iron-Salt) அடிப்படையிலான நீண்ட நேரச் சேமிப்புத் தீர்வுகளைத் தரவு மையங்களுக்கு வழங்கி வருகின்றன.
பொருளாதார தாக்கம்
இந்த அதீத மின்சாரத் தேவையானது எரிசக்தி சந்தையில் பெரும் மாற்றத்தை ஏற்படுத்தியுள்ளது. 2026 ஆம் ஆண்டின் ஆரம்பத்தில் மட்டும் மின்சேமிப்புச் சந்தை (BESS) 51% வளர்ச்சியைக் கண்டுள்ளது. எவ்வாறாயினும், உட்கட்டமைப்புச் செலவுகள் அதிகரிப்பதன் காரணமாக சில நிறுவனங்கள் தங்களது AI சேவைகளுக்கான சந்தாக் கட்டணங்களை உயர்த்தியுள்ளமை குறிப்பிடத்தக்கது.
