மத்திய கிழக்கில் யுத்தம் உக்கிரமடைந்து வருகின்ற ஒரு அபாயகரமான சூழலில், உக்ரைன் ஜனாதிபதி வோலோடிமிர் ஜெலன்ஸ்கி இன்று சவூதி அரேபியாவிற்குத் திடீர் விஜயமொன்றை மேற்கொண்டுள்ளார். சவூதி இளவரசர் மொஹமட் பின் சல்மானை (MBS) நேரில் சந்தித்த அவர், ஈரானின் ஏவுகணை மற்றும் ஆளில்லா வான்வழித் (Drone) தாக்குதல்களிலிருந்து சவூதி அரேபியாவைப் பாதுகாப்பதற்குத் தேவையான தொழில்நுட்ப உதவிகளை வழங்கத் தாம் தயாராக இருப்பதாக உறுதியளித்துள்ளார். குறிப்பாக, அமெரிக்காவினால் வழங்கப்பட்ட வான் பாதுகாப்பு முறைமைகள் (Patriot Systems) சில இடங்களில் செயலிழந்துள்ளதாகத் தெரிவிக்கப்படும் நிலையில், உக்ரைனின் நவீன 'ஆன்டி-ட்ரோன்' (Anti-Drone) தொழில்நுட்பங்களைச் சவூதியில் பயன்படுத்துவது குறித்துப் புதிய உடன்படிக்கையொன்று இதன்போது கையெழுத்திடப்பட்டுள்ளது. சவூதி மீது ஈரான் இன்று 6 பாலிஸ்டிக் ஏவுகணைகளை ஏவியுள்ள நிலையில், ஜெலன்ஸ்கியின் இந்த வருகை பிராந்திய ரீதியாக அதிக முக்கியத்துவத்தைப் பெற்றுள்ளது.
மறுபுறம், இஸ்ரேல் பாதுகாப்புப் படையினர் முன்னெடுத்த துல்லியமான வான்வழித் தாக்குதல்களில் ஈரானியப் புரட்சிகர காவல்படையின் (IRGC) மேலும் இரு உயர் அதிகாரிகள் கொல்லப்பட்டுள்ளனர். ஈரானிய பொலிஸ் கமாண்ட் பிரிவின் பிரதித் தளபதி அசிம் கர்மி (Asim Karmi) மற்றும் IRGC விமானப்படைப் பிரிவின் முக்கிய அதிகாரி முகமது அலி (Mohammad Ali) ஆகியோரே இஸ்பகான் (Isfahan) பிரதேசத்தில் வைத்து இலக்கு வைக்கப்பட்டுள்ளனர். இதன் மூலம் கடந்த 24 மணித்தியாலங்களுக்குள் மாத்திரம் ஈரான் தனது மூன்று முக்கிய இராணுவத் தலைவர்களைப் பலிகொடுத்துள்ளது. இதற்கிடையில், அமெரிக்க மற்றும் இஸ்ரேலிய இராணுவத்தினர் தங்கியுள்ள விடுதிகள் மற்றும் குடியிருப்புக்கள் மீது இனிவரும் காலங்களில் நேரடித் தாக்குதல்கள் முன்னெடுக்கப்படும் என ஈரான் பகிரங்க எச்சரிக்கை விடுத்துள்ளதுடன், பொதுமக்கள் இவ்வாறான பகுதிகளிலிருந்து விலகி இருக்குமாறும் அறிவுறுத்தப்பட்டுள்ளனர்.
இதேவேளை, இந்தத் தொடர் யுத்தத்தினால் மின்னணுப் பொருட்களின் உற்பத்திக்குத் தேவையான 'ஹீலியம்' (Helium) வாயுவிற்கு உலக சந்தையில் கடும் தட்டுப்பாடு ஏற்பட்டுள்ளது. இதன்காரணமாக தென் கொரியா மற்றும் தைவானில் உள்ள முக்கிய சிப் (Chip) தயாரிப்பு நிறுவனங்கள் மூடப்படும் அபாயத்தை எதிர்கொண்டுள்ளதுடன், வரும் காலங்களில் கைபேசிகள் மற்றும் வாகனங்களின் விலைகள் சடுதியாக உயரக்கூடும் எனப் பொருளாதார நிபுணர்கள் எச்சரிக்கை விடுத்துள்ளனர். உலகளாவிய ரீதியில் விநியோகச் சங்கிலி பாதிக்கப்பட்டுள்ள நிலையில், எதிர்வரும் நாட்கள் சர்வதேசப் பொருளாதாரத்திற்குப் பெரும் சவாலாக அமையும் என எதிர்பார்க்கப்படுகின்றது.
