மத்திய கிழக்கில் போர்ச் சூழல் உச்சக்கட்டத்தை எட்டியுள்ள நிலையில், இஸ்ரேல் மற்றும் ஈரான் ஆகிய நாடுகள் நேரடியான மற்றும் மிகத் தீவிரமான தாக்குதல்களைத் தொடுத்து வருகின்றன. ஈரான் இன்று நடத்திய 82-வது அலைத் தாக்குதலில், டெல் அவிவ் (Tel Aviv) உள்ளிட்ட மத்திய இஸ்ரேல் பகுதிகள் கொத்து குண்டுகளால் நிலைகுலைந்துள்ளதாகத் தெரிவிக்கப்படுகிறது.
கொத்து குண்டுத் தாக்குதலும் பாதிப்புகளும்
இன்று காலை ஆரம்பமான இத்தாக்குதல் மதிய அளவில் தீவிரமடைந்தது. ஈரானினால் வீசப்பட்ட கொத்து குண்டுகள் ஒரே இடத்தில் விழாமல், பரவலாகப் பல இடங்களில் வெடித்துச் சிதறியுள்ளன இதன் காரணமாக கட்டிடங்கள் மற்றும் வாகனங்கள் பலத்த சேதமடைந்துள்ளன. குறிப்பாக டிக்வா (Tikva) மற்றும் டெல் அவிவ் ஆகிய பகுதிகளில் 15-க்கும் மேற்பட்ட பொதுமக்கள் காயமடைந்துள்ளதாக முதற்கட்டத் தகவல்கள் தெரிவிக்கின்றன
முக்கிய தளபதி படுகொலை
ஈரானின் தாக்குதலுக்குப் பதிலடியாக, இஸ்ரேல் நடத்திய விசேட வான்வழித் தாக்குதலில் IRGC-யின் கடற்படைத் தளபதி டாக்ரிசி கொல்லப்பட்டுள்ளார். இவர் ஹார்முஸ் நீரிணை (Strait of Hormuz) பகுதியைத் தனது முழு கட்டுப்பாட்டில் வைத்திருந்தவர் என்பதுடன், சர்வதேசக் கப்பல் போக்குவரத்தைத் தடுத்த முக்கிய நபர் என இஸ்ரேலினால் குற்றம் சுமத்தப்பட்டவர்.
டொனால்ட் ட்ரம்ப்பின் எச்சரிக்கை
இச்சம்பவம் குறித்துக் கருத்துத் தெரிவித்துள்ள அமெரிக்காவின் முன்னாள் ஜனாதிபதி டொனால்ட் ட்ரம்ப், ஈரானுக்கான இறுதி காலம் நெருங்கிவிட்டதாக எச்சரித்துள்ளார். ஈரானின் அணுமின் நிலையங்கள் மற்றும் முக்கிய எரிசக்தி மையங்கள் மீது மிகப்பெரிய 'இறுதித் தாக்குதல்' (Final Blow) நடத்தப்படலாம் என்ற பதற்றமும் தற்போது ஏற்பட்டுள்ளது.
உலகளாவிய பொருளாதாரத் தாக்கம்
இந்தத் தொடர் தாக்குதல்கள் காரணமாக உலகச் சந்தையில் மார்ச் 26 அன்று தங்கத்தின் விலை குறையத் தொடங்கியுள்ள அதேவேளை, கச்சா எண்ணெய் (Crude Oil) விலை மீண்டும் அதிகரிக்கத் தொடங்கியுள்ளது. பல ஐரோப்பிய நாடுகள் மற்றும் ஜப்பான் போன்ற நாடுகள் எரிபொருள் தட்டுப்பாடு காரணமாக லாக்டவுன் (Lockdown) போன்ற சூழலை நோக்கி நகர்ந்து வருகின்றன.
